खारीचा वाटा

आपण केवळ देऊ शकतो खारीचा वाटा
आहे, नाही, कोण पाहतो खारीचा वाटा

माहित नाही कुठे चालला आहे हा सेतू
आम्ही केवळ त्यात टाकतो खारीचा वाटा

हात तसे तर लाखो होते त्या कार्यामागे
एखादा लक्षात राहतो खारीचा वाटा

हत्तीला जर त्याची क्षमता जाणवली नाही
कसाबसा तो उचलत असतो खारीचा वाटा

जीवनभर जो मेहनतीने साठवला जातो
वादळ येता क्षणात उडतो खारीचा वाटा

कामामध्ये जेव्हा काही राम दिसत नाही
कशास द्यावा आम्ही म्हणतो खारीचा वाटा?

© भूषण कुलकर्णी